أول يوم رمضان في بيتنا

لو هتسألوني عن رمضان، هقول لكم حاجات كتير اوي… 

هقول لكم ان من قبله بأسبوع مكالمات التهنئة بتجلينا تحسسنا بالأجواء من قبل حتي ما نعلق الزينة والفانوس.

هقول لكم ترتيباتنا لأول يوم رمضان، هنفطر فين ومع مين واهم من كل ده هنفطر ايه!

وده يخلينا نقول لكم ان فيه ثوابت لأول يوم رمضان في بيتنا، ثوابت مفيش بيت مصري يخلي منها.

      "ب ١٥الف جنية قزايز مياه قبل السحور"

و ده حالنا كلنا اول يوم على السحور، كلنا بنكون حاسيين اننا عايزين نشرب أكبر كمية مياه ممكنة بس للأسف المياه دي مش هتخلينا منعطش تاني يوم.

        "اصحي يابني احنا بقينا العصر"

اما ده فهو حال الشباب البيطبقوا لحد بعد الفجر ويصحوا على اذان المغرب عشان ميحسوش بتعب الصيام.

         "عاملين محشي وبط ورقاق"

طبعا فهمتوا انا عايزة اقولكم ايه.

 دايما السفرة المصرية في اول يوم مبتخلاش من الاكلات دي، محشي وبط ورقاق حتى لو في ناس كتير مش بتحبها بس برضه لازم يكونوا موجودين.

      "معلش يا جماعة لا سلام علي طعام"

وده طبعا بيكون كلام الشخص الدايما لازم يجي بعد اذان المغرب والمفروض نستناه وما نكلش من غيره بس في رمضان دا ما ينفعش.

       "صايم ولا زي كل سنة"

اقوال مأثورة لشخص غير مرغوب فيه.

دايما في شخص في حياتك بيسأل اسأله غير مرغوب فيها زي السؤال ده "صايم ولا زي كل سنة؟" 

طب ما انا بصوم كل سنة المفروض أرد اقول ايه؟

     "هات الريموت عايزه اجيب المسلسل"

ودي دايما خناقة كل يوم بعد الفطار واحنا قاعدين بنتفرج على المسلسلات وكل واحد فينا بيكون متابع مسلسل مختلف.

     "هو الطبق ده هيفضل طالع نازل طول الشهر"

في طبق كده يا بيجي لينا يا بنوديه للجيران وبيكون مليان قطايف، عارفينوه؟ 

اهو الطبق ده بيفضل رايح جي بينا وبينهم نبدل فيه الحلويات طول الشهر.

      "هذاكر بعد الفطار عشان وانا صايم مش مركز ولا اقولك هذاكر وانا صايم عشان بعد الفطار ببقي تقلان"

بيتهيقلي معظم الطلاب هيكونوا حاسيين بالجملة دي ومش عارفين ياخدوا قرار يذاكروا امتي في رمضان.

مهما كانت العادات والتقاليد في اول يوم رمضان، استمتعوا بكل لحظة فيه.

رمضان كريم!